عزيزى الزائر

استاذى القارئ خلى بالك ... كتباتى لا تتبع اى قواعد نحويه .... يعنى من فضلك مش تنقد النحو

اليكم

اليكم

الأحد، 27 سبتمبر، 2009

علشان انت مصرى


عشان انت مصرى ..


عشان انت مصرى لازم تعانى
وتفقد كرامتك بكل المعانى
وتحرق فى دمك سنين مش ثوانى
واوعى تصدق كلام الاغانى
بتاع الحضاره وكانى ومانى
ده كله هجايص مايدخل ودانى


عشان انت مصرى العذاب بيناديك
بتبدا فى يومك حاجات بترازيك
فى نومك فى قومك تعكنن عليك
تضايقك ولسه العماص فى عينيك
مافيش ميه تشطف صابونه فى ايديك
وجسمك ملزق وريحتك عاديك
فتلبس وتنزل وفيك اللى فيك


ورايح لشغلك حتحتاج مواصله
ادى المترو واقف وكهربته فاصله
وفى الميكروباص خناقه وحاصله
اوتوبيس فرامله عايزالها وصله
وتوك توك ده تايه ومحتاج لبوصله

بتوصل لشغلك بدم اتحرق
فى زحمه وكتمه وحر وعرق
رئيسك سايبلك كومه ورق
ده غير دمغه ضايعه وملف اتسرق
وفى كام مواطن عامللك قلق
بيشكى تقول له روح اندعق
وعركه وهوجه وشاى اندلق
ومخك خلاص من الصداع اتفلق

هترجع لبيتك ده لو كان فى بيت
هتوصل هتندم ياريتك ماجيت
مراتك بتصرخ خلاص استويت
عيالك بتطلب وهات كيت وكيت
تزعق تهاتى ياناس اتهريت
ولاحد سامعك مهما هاتيت


عشان انت مصرى وده للاسف
فلازم تاسى تعيش تتقرف
وكل الاساسى فى حياتك ترف
فتنسى الكرامه وتنسى الشرف
وتسرق وتنصب او تنحرف
ودمعك بيجرى وجرحك نزف
مش انت اللى مصرى؟؟؟ جتك القرف

5 فــارس وكــتب تــــعــليـق:

ضكتور جدا يقول...

أحييك على اسلوبك الرائع
......................
ربنا يكرمك
..................
ولو لم أكن مصريا لوددت أن أكون.........
.............
تحياتي أخوك محمد سليمان

طالبه اخوانيه يقول...

ولو لم أكن مصريا لكنت أرتحت نفسيا

بجد أسلوب رائع

وتدوينه رائعه

تحياتى ضحى مصطفى

قلب فارس يقول...

البيت الشعرى هو لو لم اكن مصريا لارتحت نفسيا فى هعدنا المبارك
اما كان زمان لو لم اكن مصريا لاودت ان اكون مصريا
شكرا على تعليقاتكم يا دكتور محمد سليمان وطالبة اخوانية

مدونة عمار اون لاين يقول...

رائعة رائعة رائعة ... ربنا يبارك فيك
ولو لم اكن مصريا ..... كان ربنا كرمني من زمان

عاشق الجنة من الإخوان صلى على النبى يقول...

والله ربنا كريم
قادر يخلصنا من اللي كابسين علي نفسنا
ومكرهينا في بلدنا
صلي علي النبي

إرسال تعليق

( مَا يَلْفِظُ مِن قَوْلٍ إِلا لَدَيْهِ رَقِيبٌ عَتِيدٌ )