عزيزى الزائر

استاذى القارئ خلى بالك ... كتباتى لا تتبع اى قواعد نحويه .... يعنى من فضلك مش تنقد النحو

اليكم

اليكم

الخميس، 30 سبتمبر، 2010

لن احلم ثانية


السلام عليكم ورحمه الله وبركاته
تذكرت فيلم مطب صناعى
عندما قال الممثل الكوميدى احمد حلمى للممثله نور وهما راكبين المركب
يلا نامى ونتقابل فى الحلم .
فقالت انا مش بحلم
فقال لها يااااه بضيعى نومك فى ايه ......
تذكرت هذا وضحكت بعد فترة من التفكير فى احلامى الكثيرة التى تمر عليها هذه الايام
وقلت يارب اكون زى نور فى اننى مش احلم .
لان احلامى غريبه اليومين دول ....
احلم مرة برئيس حزب الوفد ان هو رئيس لمصر وده من رابع المستحيلات ..
لانى الريس محمد حسنى مبارك موجود ..
وتذكرت موقف بيقول
واحد مصرى بيسأل الريس ينفع ياريس واحد مسيحى يمسك الحكم .
الريس قال ولا مسلم يابنى ....
هكذا هو الحال
حلم اخر ...

الأربعاء، 29 سبتمبر، 2010

مع المفاوضات تحت مسمى هدنه او معاهده سلام لمده محددة ومش عارف اعمل ايه فى انتخابات الشعب القادمه

السلام عليكم ورحمه الله وبركات
هذه الايام يوجد اخبار تسر واخبار لا تسر ابدأ ..
ويجب ان نتكلم عن عن الاحداث الجاريه .
وياريت اللى يعلق يعلق على وجهة نظرة يعنى لو ضدى فى الرائ عادى قول رايك مش تخاف مش هغتالك . هههههه ...
والحاجات دى هبين فيها وجهة نظرى ولو مش عجباكم ممكن تردوا عليها
*عن الانتخابات نشارك ام لا نشارك ...
صلوا على الشفيع فى يوم لا ينفع فيه مال ولا بنون .
اولا .. انا مش عارف حتى الان اقاطع ولا اشارك حتى الان لا اعرف ماذا اقول فى هذه القضيه ...
وبذلك قد سمعت اراء الناس اللى اكبر منى فى هذه القضيه وقرأت للكثير
ممن قالوا قاطعوا الانتخابات او نشارك فى الانتخابات .
فى اول الامر قلت قاطع ولما قلت لواحد لازم نقاطع الانتخابات
قالى يابنى لو قاطعت هتستفاد ايه النظام مش عنده دم ممكن ينزل ناس مستقلين ويشجع فيهم وينجح عدد كبير منهم ...
او ينزل الاحزاب بتعوته ويقول فيه ناس واحزاب شاركوا كتير ....
مش هتسفاد حاجه
قلت طب نشارك
قالى برضه هتستفاد ايه هيزور الانتخابات وينجح اللى هو عاوزة
قلت الله حيرتتنى طيب نعمل ايه قالى مش عارف
فقلت فى سرى سيبك من الراجل ده وفكر ..د
ففكرت وقلت لا لازم نشارك علشان صوتى لازم يوصل لو حتى يوصل لعند الصندوق مش مهم بس لازم يطلع لى صوت مع ان انا عارف ان فيه تزوير ...
* بخصوص المفاوضات

فاانا مع وضد المفاوضات المباشرة
وبمعنى اخص انا ضد الحوار مع اسرائيل تحت مسمى المفاوضات
اظن ان الهدف من المفاوضات ان تقوم دوله جوار دوله تعترفان كل منهما بالاخرى وكانهما دولتنان تعيشان من قديم الازل
نعم انا ضد الحوار تحت مايسمى المفاوضات
ولكن مع الحوار تحت مايسمى معاهده سلام لفترة من الزمن ..
للاسباب الاتيه ان دوله اسرائيل عفوا دوله الكيان الصهيواميركى العربيى نعم دوله اسرئيل من قامها هم امريكا والعرب ....
لانها ليست دوله بالفعل فهى كيان قائم على جماجم الشهداء الفلسطينين ..
ويجب ان ترجع الى اصحابها فى اى وقت ولو حتى بعد 1000 عام يجب ان ترجع ...
نعم انا ضد المفاوضات ومع معاهده سلام ...
حتى نبنى البينه التحتيه للشعب الفلسطينى ..
ويجب ان يقوم دولتنان اما ان يكون منزوعتنان السلاح او تمتلكان للسلاح ..
يجب ان يتساووا فى الحقوق ...
مع المفاوضات التى لم توقف المقاومه فاوض على راحتك ولما تفاوض وتتم نقول نوقف مقاومة ولا لا ...
وسلام
معلشى لو مش فهمتم حاجه

الاثنين، 27 سبتمبر، 2010

حاجات تشيط " تغلى " الدماغ ياراجل ...

""ناسف مش رديت على التعليقات فى الموضوع السابق لانى مش انا اللى كاتبه ""
من فكاهات الاعلام المصرى .. سواء كانت صحف او برامج التوك شو التى اشاهدها او اقراءها ... كثير مايضحكنى الكتاب والصحفيين والاعلامين ..
من كلمات ومن مواقف ...
امثله لهذه المواقف والكلمات ...
* فى كثير من المقالات الاخباريه اقرأ ...
فى سريه تامه سيتقابل الرئيس الفلانى مع الرئيس الفلانى وسيناقشون القضيه الفلانيه فى سريه تامه ....
تضحكنى هذه الجمل .. مما يحمل معناها من فكاه وضحك .. اظن انها تنفع كاريكاتير فى جريده الدستور بتاعه زمبوووء
بالله ازاى سريه تامه ولسه ستعقد وانت عرفت ولو عرفت ازاى بقى يبقى سريه ... دا الخبر اللى انت بتكتبه شوف كام واحد بيقراءه ..
دا فى مثل بيقول السر لو خرج على الاثنين مش يبقى سر... وانت بيقراء خبرك المئات بل يصل الى الالاف ..
* اعلامى رياضى محلل رياضه بعد المباراة التى تشاجر فيها الفريقين المصريين ياأتى ويقول على المخرج والاعيبه والجماهير .. فضحتونا فضحتو مصر الكبيرة دائما بااخلاقكم السيءه هذه دى رياضة مش مصارعه الله يسامحكم فريقين زى دول يتخانكوا ويقلوا ادبهم شوهتوا صورة مصر ..
وبعد هذا الكلام المحمل بالوطنيه وحب الوطن .. يقول شوف شوف عمل ايه بيده شوف شوف قال ايه بشفايفه شوف شوف قال ايه للجماهير .. يخلى اللى مش شايف الماتش يشوف قله الادب ... خلى اللى مش اشترى يتفرج زى مابيقولوا ..
* ثالث الاشياء التى تجعل قلبى يضيق صدرا بالاعلام من استخفاف عقول المصريين وهو فى البرامج الحواريه وبالاخص مابين المعارضه والحكومة وبالاخص اكثر العلمانين او الاسلامين ..
ياتى مقدم او المعد للبرنامج بضيف من الحكومة او العلمانين قوى فى اسلوبه مؤثر بهددؤءه و من المعارضه او الاسلامين ضعيف فى اسلوبه الحوارى يناقش بصوت عالى سريع التعصب لا يعرف كيف يرد على العلمانى او الليبرالى فى اشياء كثيرة حتى يقال هؤلاء هم المعارضه او هؤلاء هم الاسلامين ..
و شئ اخر فى ..
عندما يتكلم الليبرالى او العلمانى ترئ مقدم البرامج فى سكون تام ينصت اليه فقط ولا يناقشه ولا يتكلم الاسلامى احترام للمتكلم ..
وعندما يتكلم الاسلامى ترى المقدم يتكلم ويناقش الاسلامى بطرق تستفز الشخص الذى يتكلم ...
وشئ اخر ...
عندما يتكلم الاسلامى يقاطعه الليبرالى او العلمانى طوال ماهو يتكلم ولا احد يتكلم اما لو حدث العكس يقول ايون انتوا كده يااسلامين مش بتسمعوا الرائ الاخر ارهابيين متعصيبين جعجاعين ومن هذه الكلمات البذيئه التى نشرها الاعلام ..
................
حاجات تشيط الدماغ

السبت، 25 سبتمبر، 2010

مصر دائمأ فى تقدم



بقلم / مواطن مطحون جداً
مصر دائما في تقدم مستمر عن باقي الجيران وأهالي الحي فنحن نتقدم ساعة صيفا ونتأخر ساعة شتاء ..

ومع مزيد من التقدم فمصر البلد الوحيدة التي يعرف من رئيسها السابق ورئيسها الحالي و رئيسها القادم دون الذهاب إلى دجال أو منجم أو حداد أو حتى رئيس حي ..

أيضا من علامات التقدم في مصر إصدار فتوى لشيخ الأزهر بالرفق بالحيوان وعدم التعامل معه بعنف ومن منطلق الديمقراطية وحرية الرأي قامت العشوائيات بعمل مظاهره كبيره تطالب فيها الانضمام إلى الفتوى لتصبح ( الرفق بالحيوان والعشوائيات ) إلا أن شيخ الأزهر لم يعلن الانضمام بعد .. ليه الله أعلم

مصر تقدمت كثيرا حتى ظهرت شيخوختها وعندما تم عرضها على طبيب متخصص في أعراض الشيخوخة ليعلن أن مصر جاء عليها الزمن وأنها أوشكت على الانتهاء قامت الحكومة بتحويل أوراق الطبيب إلى المفتى وذلك لإعدامه بعد أن طعن أمنا في سنها وفى دقائق ظهرت براءة الطبيب بعد ما اكتشفوا أن الطبيب المعالج حزب وطني وان الخطأ كان من الممرضات عندما بدلوا تحاليل أمنا مصر مع تحاليل طفل عمره 4 سنوات واتضح أن الطفل هو المصاب بالشيخوخة وليست أمنا مصر..

وأخيرا إذا أردت أن تشاهد التقدم فعليك بالصعود فوق برج القاهرة لتشاهد خطة التنمية وهى تتقدم بشكل ملحوظ دون أن تمسك تليسكوب فلكي , فهي واضحة وضوح الشمس الساعة 3 فجرا ..

شفت التقدم ؟ انزل بقى من على البرج وبلاش رخامه .. فى غيرك عايز يشوف التقدم وروح البيت وخد معاك شريط برشام صداع ونام بدري علشان تلحق التقدم من أول النهار وإياك تفتح الشباك لأن الجيران لو سمعوا هلوستك عن التقدم وانت نايم , احتمال كبير يتصلوا بالعباسية ..
معلهش لازم تعذرهم
أصلهم ما طلعوش فوق البرج
_________________________--
اسمعوا الفديو ده جميل جدا الاعلان الجديد للاتصالات

الخميس، 23 سبتمبر، 2010

تعلموا من فيلم سبايدر مان .. " لجريده الاهرام والاستاذ مجدى الجلاد "


يعجبنى كثير الاستاذ مجدى الجلاد الذى اكن له كل احترامى وتقديرى فاانا والله احبه كثير واحب افكاره واقراء مقالاته ...
وقرات مقاله اليوم على صفحه من صفحات جريده المصرى اليوم ..
بااسم دفاعا عن الاهرام ...
صراحه لم اتخيل انها جريده الاهرام ..
فقراءت العنوان وتركت الصفحه ولم اقراء المقال . لاظنى بان المقال متعلق بالاهرام الموجوده فى الجيزة ..
ولكن بتطفلى وحب الاستطلاع قراءت الموضوع .. ووجدته عن جريده الاهرام .. واخذ يدافع عنها دفاع مستميتا" وفعلا استثار اشمأزازى وكمان زاد اعجابى بالرجل لاحترامه "
واخذ يتكلم ويكتب كثير عن فضل جريده الاهرام الذى لا ينكرها اى حقود فى تقدم الصحافه المصريه يقول ان اى جريده تحتمل الصواب والخطا وكثير منا مخطئ الا النصوص المقدسه وجريده الاهرام ليست بالمقدسه لان صانعها بشر ...
نعم يااستاذ مجدى هذه الجريده لها قراءها المحترمين وكتابها الاكثر احتراما ....
نعم يااستاذ مجدى الجريده من صناعه البشر والبشر يتحملون الصواب والخطأ ..
ولكن يااستاذ مجدى ..
الخطا مقبول فعلا ..
ولكن خطأ كهذا وفى جريده كهذه لا يغتفر ..
لانها من اكبر الصحف كما قلت
الخطأ الذى يمكن ان يغتفر له اذا اخطأ فى نقل خبر من على لسان احد الرؤساء او الوزراء . ولم يتحقق منه وهلل على كلامه ..
الخطأ الذى يمكن ان يغتفر له اذا اخطأ فى نقل او كتابه خبر كاذب يمكن ان يغتفر له ....
الخطأ الذى يمكن ان يغتفر له اذا كانت الصورة فى باب صدق او لا تصدق او باب الكاركاتير ..
اما عن صورة مفبركه صانعها بيده ووضعها فى باب الاخبار ...
اظن انه لم يغفر له ...
وتذكرت ايضا فيلم سبايدر مان اظن اظن الثالث ..
عندما فبرك احد المصورين وهو فينيوم احد اصدقاء وعدو بيتر باركر ( سبايدر مان ) فى نفس الوقت ..
عندما فبرك صورة لسبايدر مان ..
وعندما عرف رئيس تحرير الجريده بهذا ماذا فعل ...
عمل اعتذار على الجريده وفصل هذا المصور من الجريده ...
ومن هو رئيس محرر الجريده
احد اعداء سبايدر مان ...
واخير اقول...
تعلموا من فيلم سبايدر مان..

الثلاثاء، 21 سبتمبر، 2010

خير الله مااجعله خير. حلمت باان البدوى رئيس لمصر


خير الله مااجعله خير
الجمله دى بنقولها لما نلاقى واحد هفتان وزعلان من حاجه
وبنقوله خير الله مااجلعه خير
وكمان بنقولها لما الواحد يجى يحكى اليك حاجه
بتقوله خير الله مااجلعه خير ...
وانا عاوزكم تقولوا لى خير الله مااجعله خير ...
قلتم
طيب اسمع منى الحلم ده ..
خير الله مااجعله خير
حلمت باان رئيس حزب الوفد د. السيد البدوى رشح نفسه للرئاسه ضد الريس حسنى مبارك وفاز السيد البدوى وشكل حكومة ...
وفرحت جدا ورحت اليه وسلمت على البدوى واخذته بالاعناق ..
وقلت الحمد لله ان انا شفت رئيس سابق قبل مااموت .............
وبهذا قد تم الحلم ......
مع ان احلامى كلها عكس الحقيقه ....
الا فى الرموز زى حلمت بان تعبان قرصنى او ان قطه بتجرى ورايا او ... او ...او ...
مش عارف عبارهعن ايه الحلم ده
ياريت يتحقق والله حلمت بيه .. حلم حقيقى
مع ان فكرى مش زى فكر الوفد ...

وبقول يارب البدوى يكون رئيس لمصر او اى حد تانى
____________________________________________________________________
وبالمناسبه شوفوا الصورة دى

الجمعة، 17 سبتمبر، 2010

ينظر ويتأمل ويحلل ..


بسم الله الرحمن الرحيم
كنت انا واحد الاصدقاء المقربين الى قلبى نسير فى احد شوارع قريتنا العزيزة .
وكنا نتكلم فى اشياء تخصنا نحن الاثنين عن الدراسه واشياء اخرى داخل كلا الكليتين . كليتى وكليته .
وعن الانشطه ..
فااذا ونحن سائرون فى احد الشوراع سمعته يقول سبحان الله وينظر ويبحلق فى احد ما امامنا ..
فقلت له مالك .
قالى ياااه انظر جمال هذه البنت
قلت اليه يابنى حرام عليك غض بصرك عيب ..
قالى ايه انت هتحرمها بتأمل فى خلق الله . .
وحللها لنفسه
ههههههههه
كان عارف نفسه غلطان بس بيضحك
.
تذكرت مسلسل العار المذاع فى شهر رمضان اللى فات ..
عندما كان مصطفى شعبان يحلل الحرام ..
ربنا معاكم ياشباب

الثلاثاء، 14 سبتمبر، 2010

مر عام على التدوين



السلام عليكم ورحمه الله وبركاته
مر عام على التدوين.
عام من حب الانترنت .
عام من توسيع المعلومات .عام من خلق مزيد من الاصدقاء الجدد .
عام من معرفه العالم الخارجى ..
فى مثل هذا اليوم مر عام على انشاء مدونة قلب فارس ...اشربوا العصير ...
والسؤال هنا ..
اول سوال وكالعاده من انت .
ادخل على هذا الرابط وهتعرف مين انا
تعريف بنفسى نبذه قصيرة اضغط هنا
***ماهو اكثر الاشياء جذبتك حول التدوين .....
هو الايجابيه واخراج المكبوت والحريه وتعرض فيه زى ماانت عاوز.
*** كم موضوع كتبته وماهو هو اجمل موضوع ..
كتبت 169 موضوع واجمل موضوع
هو الفرق بين حسن وحسين
اخوانى المسيحين اهدوا وعذرا
يابابا اشترى لى طفطف بدل ماانا عاطل كده
وقصه حلم تائب
** كم عدد التعليقات ..
عدد التعليقات 1280 تعليق
*** كم عدد الزوار .
12913 زائر ...
*** ماهو عدد الزوار المتوسط فى اليوم ..
50 زائر
***ماهى اجمل المدوانات التى زرتها ...
يوووووووووووه كتير
***ماهى اقبح المدوانت اللى زرتها
يووووووووووه كتير
***ماهو العضو اذا لو علق على موضوعك تفرح ...
يوووووووووووووووه كتير اوى
***ماهو اول موضوع كتبته واول تعليق....الموضوع هو البدايه واول تعليق هو عاشق الجنه من الاخوان
***تشكر مين من المدوانات ..
اشكر كل من عليق تعليق على مدونتى لانه يزيد الحماسه لدى لاكتب واقرا كثير
وبالاخص ومش بترتيب يعنى علشان مش فيه حد يزعل يقول انت جبت ده الاول ليه ...
1. الريس
2. زهرة (جنى )الاسلام
3. ساسو اشعار وتاليف
4. mrmr مدونة الضحك والفرفشه مدونة ابتسامات وامنياتى
5.مرايتى ..
6.مدونة احلى ملاك
7.امه الله
8.الحب الجميل
11.ام الخلود اعقل مجنونه فى الوجود .
12 .علا المصرى كل يوم
13. سلسبيل بنوته اون لاين
14.شــارم
15 . ابوالمعالى فائق ( لقمه عيش )
16. طبيب اطفال ابو مصعب ..
17. الشاعر المفضل لدى ( عمار مطاوع )
18. ويــكا ( بصراحه )
19.علاء سالم
20.جنى
21.انا حره ومش عارف ليه مش بتكتب من زمان
22.سبايدر مان
23.انا حرة
24. قل ياقلم مش بتعلق زى الاول
25.بدايات
26.افكار صغيرة اظاهر ساب التدوين
27.الاغلبيه الصامته
مش فيه حد يزعل من اللى انا نسيتهم بس والله بشكرهم كثير
***ايه المدون اللى لو علق على مدونتك بتحس ان الموضوع الى حد ما اليه فايده او منسق ؟
طبعا طبعا انا مش بعرف اكتب اى مدونتى عاميه او نصها كده والنص الاخر غير الاول ...
اما بخصوص المدونة اللى اكتر حاجه بفرح لما اشوفها عندى
مش مدون وةاحد كتير ومنهم
الريس ولقمه عيش ومرمر واشعار وتاليف وزهرة وبنوته اون لاين وكلمات من نور وعماراون لاين واستاذنا فشكول وكتير كتير والله
كل مدون بيعلق بيبعث فى الامل من جديد
*** ماهو المدون اللى بتحب تقرا اليه؟؟
صراحه انا بقرا للكل بس اكترواحد بقرا اليه
لقمه عيش وعمار والريس وزهرة ومرمر واى مدونة فيها اشعار واعقل مجنونة وسلسبيل وشارم
*** ما هى امنيتك بالنسبه لمدونتك ..؟
اتمنى ان مدونتى تكون زى مدونة لقمه عيش من حيث المحتوى والاسلوب والشهرة والفكر
*** ماهو المدون الذى تريد ان تصبح مثل اسلوبه؟
كما قلت لقمه عيش .. والريس ومدونة حمودة والاغلبيه الصامته
واخير بحبكم كثير كثير كثير ...

............
وبهذا اشكركم وكل عام وانتم بخير ونتمنى التواصل
ولو حد زعلان منى فى حاجه ممكن نتواصل على الميل
qalbfars112010@yahoo.com

كنت اتمنى ولم اعد اتمنى .. لما رائيته

السلام عليكم ورحمه الله وبركاته ...
من باب المثل الشعبى " اللى يشوف مصيبه غيره تهون عليه مصيبه نفسه " ..
انا شاب عمرى 18 سنه وحيد اى انا الولد الوحيد لبابا وماما .. كنت اتمنى ان يكون لى ولد اخر حتى يمارس معى هوايتى المفضله .و ان يكون اصغر منى بسنه او سنتين حتى يفهمنى وافهمه .. وكنت لما اشوف اصدقائى ماشين مع اخواتهم ويلعبوا مع بعض كنت بحسدهم على حبهم لبعض ودفاعهم عن بعض ...
ولكن عندما كبرت او فى سنى هذا وفى وقتى هذا ... انقلب الحال الى حال ... لا لا لا
ليس بسبب الجيش ... لا لا لا لا

ليس بسبب ذاك ولا ذاك
ولكن بسبب الذى رايته
...
اليكم ماحدث
فى ايام العيد
كنت اشارك ابى فى مواصله صله الارحام وعند سيرى معاه فى الطريق كنت اساله عن ذاك وذاك وماهو وماهى معاملاته وهل هو محترم ام انه غير ذاك ... هل اشاركه فى عمل ام لا ...
كانت كل هذه الاسئله اسئله ايها ...
الا سؤال واحد ماهى معاملاته مع اخوته "اشقاءة "
فبعد سيرى الطويل معه ...
رايت رجل يقف فى اخر الطريق الذى كنا نسير فيه رجل كبير فى السن يفوق سنه 60 .. اظنه وقف الى احد اخر ولكنه وقف الينا يسلم عليا وعلى ابى
الرجل الغريب .. ازيك ياعم الحج كيف الاحوال
بابا .. الله يسلمك كل سنه وانت طيب ..
الرجل الغريب .. وانت طيب عملت ايه فى الطلب ده
...
بابا .فقال والله خلاص هما قالوا استنى بقى لما احنا الاربعه نتفق ..
الرجل الغريب .فقال طيب انا هروح ارفع عليهم ...
فلم يلفت انتباهى لهذا الكلام ولكن بعد رد بابا بقول
بابا .. اللى انت عاوزة اعمله اعمله بس الخلاف اللى بينكم هما عوزين يجيبوا من اول ماابوكم مات لعند دلوقتى اما انت عاوز من حته معينه
فبعد هذا الرد لفت نظرى واستغربت وقلت مشكله اخوات يااااه يروح يرفع قضيه على اخواته .. ليه
فبعد ذهبنا بعيد عن هذا الرجل فقلت لبابا
ايه مشكله اخوات
قال اه
قلت ياااه يرفع قضيه على اخواته
فقال انت تحمد ربنا ان مش اليك اخوات
وبعد هذا الموقف ليس بكثير بمده لا تزيد عن ساعه او نصف ساعه تقريبا نفس الحال
بابا . بيكلم واحد ..
بابا .. هاا اخواتك عاملين ايه
الراجل اهو ياعم الحج بياكلوا ويشربوا ..
صراحه استغربت
بابا .. مش فيه اى تقربات
الرجل لا احنا كده قطعنا الميه والنور من ناحيتهم
بابا ربنا معاكم
.....
فقلت لبابا حتى ده متخانق مع اخواته
بابا .. قال اه عااادى على ان هى كلمه عاديه
قلت يااااه عاادى كده
قال يابنى وانت لسه شفت حاجه اكثريه البلد كده ...
فقلت الحمد لله
وبعدها انقطعت سيرة ان كنت اتمنى ان يكون لى اخ
الحمد لله يارب ان مش فيه لى اخ
فتذكرت قصه قابيل وهابيل
قلت ياااه المشكله من قابيل وهابيل
حتى الجيران والاخوات وحتى الدول العربيه
يااارب يهدى
للتذكره
"صوابع يدك مش زى بعضها "

الجمعة، 10 سبتمبر، 2010

اخر يوم فى رمضان .. يوم ولادتى بالهجريه .

كل سنه وانت طيبين بمناسبه العيد ومدونة قلب فارس تهنى الامه الاسلاميه والعربيه بمناسبه عيد الفطر المبارك ...
عيد ميلادى بالهجريه فى ليله العيد الموافق يوم 1 /5 /1992 ميلاديه الساعه 2 صباحا قبل فجر العيد بساعتين . ..الواحد كل لما يفتكر يوم ماتولدت حصل ايه بيضحك كتير ..... طبعا مش كنت حاسس وقتها بس من حكاوى ماما على يوم الولادة اصل انا بحب اسمع حكاوى ايام زمان بس علشان مش تقولوا عليا كذاب ههههه . بعد ماسمتنى" الحاجه ام ابويا " بعيديه على انى بنت علشان مش اتحسد . اصل عبالكم انا بعد بنتين ...والحاجه ام بابا الله يرحمها كانت بتخاف عليا كتير وكانت على طول بتشربنى ميه بليمون .الله يرحمها كل لما ازعل افتكرها ....
كل عام وانتم بخير